హైదరాబాద్ నాంపల్లి ఎగ్జిబిషన్ గ్రౌండ్స్ లో హిందూ సేవా ఆధ్యాత్మిక మేళా కోలాహలంగా సాగుతోంది. మూడురోజుల మేళాలో భాగంగా శనివారం ఉదయం ఆచార్య వందనం నిర్వహించారు. కేశవ్ మెమోరియల్ విద్యా సంస్థల కార్యదర్శి డాక్టర్ అన్నదానం సుబ్రహ్మణ్యం అధ్యక్షతన ఈ కార్యక్రమం జరిగింది. ఇంపాక్ట్ సొసైటీ వ్యవస్థాపకులు గంపా నాగేశ్వర్ రావు, ప్రముఖ అవధాని మాడుగుల నాగఫణి శర్మ అతిధులుగా హాజరయ్యారు. నేటి కాలంలో విద్యార్థులు, యువత.. గురువుల ప్రాధాన్యతను తెలుసుకోవాలని వక్తలు అభిప్రాయపడ్డారు. విద్యార్థి దశలో పునాదిని నిర్మించిన గురువులను, ఆ స్ఫూర్తిని జీవితాంతం గుర్తు పెట్టుకోవాలని సూచించారు.
మధ్యాహ్నం సంఘ్ ప్రాంత ప్రచారక్ లింగం శ్రీధర్ ఆధ్వర్యంలో పాఠశాలల నిర్వాహకుల సమ్మేళనం జరిగింది. ఇందులో ఉపాధ్యాయ శ్రేష్టులు ఎస్ ఎన్ రెడ్డి, ఎస్ వి ఎస్ లక్ష్మి నారాయణ తదితరులు పాల్గొన్నారు. .
వివిధ సేవా క్షేత్రాలకు సంబంధించిన స్టాల్స్ ఏర్పాటు చేశారు. వారాంతం కావడం తో సందర్శకులు పెద్ద సంఖ్యలో విచ్చేశారు. స్టాల్స్ దగ్గర ఆగి విశేషాలు తెలుసుకున్నారు.
సాయంత్రం ఆత్మీయ వాతావరణం లో గురు వందనం నిర్వహించారు. డీ పీ ఎస్ పాఠశాల చైర్మన్ శ్రీ అజయ్ గుప్త అధ్యక్షత వహించారు. అతిథులుగా కేశవరెడ్డి విద్యాసంస్థల అధ్యక్షులు ఎన్ కేశవ్ రెడ్డి, బచ్ పన్ గ్రూప్ ఆఫ్ స్కూల్స్ చైర్మన్ కే శ్రీకాంత్ రెడ్డి, రామకృష్ణ మఠం అధ్యక్షులు బోధమాయానంద స్వామి హాజరయ్యారు. వివిధ పాఠశాలలకు చెందిన విద్యార్థులు నిర్వహించిన సాంస్కృతిక కార్యక్రమాలు అందరిని ఆకట్టుకున్నాయి.
ఈ తరం విద్యార్థులు యువతకు భారతదేశం విలువలు సంస్కృతి సంప్రదాయం తెలియజెప్పేందుకు ఈ కార్యక్రమాలు నిర్వహిస్తున్నట్టు నిర్వాహకులు తెలిపారు. ప్రతిరోజు ఒక అంశం మీద వందనం కార్యక్రమం చేపట్టేలా రూపకల్పన చేశారు.
